Тое, што кранае сэрца
29.11.2022Працягвае рэалізоўвацца пілотны праект па арганізацыі наведвання вучнямі старэйшых класаў экскурсійных аб’ектаў па знакамітых месцах Рэспублікі Беларусь.
У рамках вучэбнага прадмета “Беларуская літаратура” для дапаўнення ведаў па тэме: “Гераічнае і трагічнае ў літаратуры”, па аповесці “Знак бяды” В.Быкава, вучні 11 класа Шчорсаўскай сярэдняй школы, 29 лістапада, наведалі месца масавага генацыду яўрэйскага народа і злачынства фашыстаў на тэрыторыі Беларусі – мемарыяльны комплекс “Трасцянец”, дзе працавалі і прынялі смерць тысячы людзей.
Трасцянец... Што нашы дзеці ведаюць пра яго? Ці баліць у іх сэрца, калі яны чуюць гэтае слова? Месца, дзе адзінаццацікласнікам адкрылася маштабнасць трагедыі лагера смерці, які з’яўляецца самым буйным на тэрыторыі Беларусі. Вялікае ўражанне на вучняў зрабіла наведванне і помніка-манумента ”Брама памяці”, і “Дарога смерці”, і поле пахавання, і помнік на месцы крэмацыйнай ямы-печы. Кожны змог адчуць боль, страх і пакуты, якія выпалі на долю вязняў канцлагера. Памяць аб гэтых страшных падзеях ўвекавечана ў пастаментах, інфармацыйных табліцах і не пакідае абыякавымі нікога.
Яшчэ больш незгладжальнае ўражанне пакінула наведванне месца масавых расстрэлаў яўрэйскага і беларускага народаў ва ўрочышчы Вялікі Трасцянец, дзе падчас Вялікай Айчыннай вайны было расстраляна 6500 чалавек. Нельга было не звярнуць увагу на папяровыя шыльды жоўтага і белага колераў, прымацаваныя да дрэў. На жоўтых пазначаны імёны забітых прадстаўнікоў яўрэйскага насельніцтва, на белых - беларусаў. Дзякуючы вопытнаму, дасведчанаму экскурсаводу вучні вельмі блізка сутыкнуліся з самымі страшнымі падзеямі мінулай вайны, пераасэнсавалі, чаму так важна захаванне міру на ўсёй зямлі. Ні адзін элемент мемарыяльнага комплексу “Трасцянец” не пакінуў раўнадушнымі вучняў. Толькі памяць, веданне гісторыі, павага і пачуццё патрыятызму спрыяюць выхаванню маладых людзей сапраўднымі грамадзянамі сваёй краіны.