З ГІСТОРЫІ ШКОЛЫ
Гісторыя заснавання Шчорсаўскай школы цесна звязана з графам Іахімам Літаворам Храптовічам.
Іахім Літавор са славай
Займаўся і дзяржаўнай справай:
Быў наш граф – міністр асветы
І нямала дбаў пра гэта,
Школу ў Шчорсах адчыніў,
Каб народ дзяцей вучыў.
Школа ў Шчорсах працуе з некаторымі перапынкамі з 1773 года.
Спачатку гэта была царкоўна-прыходская пачатковая школа, у якой навучалася каля трох дзясяткаў юнакоў (дзяўчынак у школу не бралі). Школа знаходзілася ў цесным наёмным сялянскім доме. Заняткі праводзілі ў зімовы час.
Як даніна павагі заснавальніку школы, як сімвал непарыўнасці і пераемнасці ў навучанняі герб нашай установы адукацыі.
Шчыт і шлем - сімвалы абароны, нашай абароненасці.
Чырвоны колер шчыта сімвалізуе нашу сілу.
Лук са стралой паказвае, што наша сіла магутная і накіравана на авалодванне ведамі і мудрасцю продкаў (пра гэта сведчыць раскрытая кніга).
Інакш кажучы, нашы веды – ёсць наша сіла і абарона.
Але вернемся зноў у гісторыю. З 1814 года старэйшы сын Яўхіма Храптовіча Адам для сялян трымаў уласным коштам буйныя пачатковыя школы ўзаемнага навучання ў Шчорсах і Нягневічах. У Шчорсаўскай школе, дзе пачаткамі навукі авалодвалі 256 вучняў розных веравызнанняў (паводле звестак 1822 года – 350 вучняў), выкладанне вялося па метаду англійскага педагога Ланкастара. Школа лічылася ўзорнай. Акрамя атрымання элементаргых ведаў, дзеці вучыліся на старастаў, пісарчукоў, эканомаў.
У час паўстанняў 1831 - 1832 гадоў., 1863 – 1864 гадоў.школа не дзейнічала.
У 1875 годзе на месцы сучаснага лясніцтва на сродкі графа Храптовіча быў узведзены прыгожы драўляны будынак, дзе і размясцілася земская народная трохкласная школа з 4-х гадовым тэрмінам нвучання, у якой да пачатку Першай сусветнай вайны набывалі веды каля 200 дзяцей. Загадчыкам школы больш як 15 гадоў працаваў Анісім Рамановіч .
У 1915 годзе фронт шчыльна падышоў да Шчорсаў. Многія жыхары выехалі з родных мясцін. Да 1917 года школа ў Шчорсах зусім не працавала.
У час акупацыі Заходняй Беларусі Польшчай з 1921 года да 1939 года ў Шчорсах працавала гэтак званая сямігадовая “школа паўшэхная”. Навучальная ўстанова была раскідана па прыватных дамах. Кіраўніком школы была Грабоўская Марыя Гіляраўна.
У гады фашысцкай акупацыі навучанне ў школе амаль не вялося.
У верасні 1944 года школа прадоўжыла сваю працу ў цэнтральным корпусе былога графскага палаца. Дырэктарам быў Шышэя Андрэй Ігнатавіч.
У 1946 – 1947 навучальным годзе школьныя памяшканні былі перададзены навучэнцам спецыяльнай сельскагаспадарчай школы. Шорсаўскія вучні сталі набываць веды ў будынку былога пастарунка (ля сенняшняга памяшкання лясніцтва).
У верасні 1947 года школа вярнулася ў былы графскі маёнтак. З 1946 г. да 1952 г. школай кіраваў Ёрш Іосіф Канстанцінавіч. З усіх настаўнікаў, якія працавалі ў школе, толькі двое мелі вышэйшую адукацыю.
З 1950 года Шчорсаўская школа стала васьмігодкай, 3 1952 года – сярэдняй.
У 50-х-60-х гадах мінулага стагоддзя школай кіравалі Бязручанка Іван Сцяпанавіч, Шарыкала Уладзімір Лявонцьевіч, Лаўрыновіч Сяргей Паўлавіч, Каралёў Анатоль Васільевіч.
З 1976 года сярэднюю школу ў Шчорсах узначаліў Мікалай Лазаравіч Аляшкевіч.
У 1986 годзе дырэктарам Шчорсаўскай сярэдняй школы стаў Іван Серафімавіч Паддубіцкі.
З 2005 года школай кіраваў Мікалай Міхайлавіч Кулеш.
За гады існавання сярэдняй школы з яе сцен выйшлі 112 выдатнікаў.
У тым ліку 42 ўладальнікі залатога медаля, 32 – сярэбранага.
З 2010 да верасня 2022 года арганізоўвала і накіроўвала работу Шорсаўскага дзіцячага сада – сярэдняй школы Анжаліка Іванаўна Рамановіч.
З 1 верасня 2022 года Шчорсаўскую сярэднюю школу ўзначаліў Ігар Мікалаевіч Палазок.